ميدو يرد على هجوم جماهير الأهلي بعد تصريحاته الأخير بشأن عدم تشجيع الأهلي

صرح مهاجم نادي الزمالك السابق والمنتخب المصري أحمد حسام ميدو عدة تصريحات بشأن ما أدلى به مؤخرًا بعدم تشجيع النادي الأهلي في أي بطولة، ورد ميدو على الهجوم القوي من جماهير النادي الأهلي بعد تصريحاته الأخيرة، وذلك عبر حسابه الرسمي عبر حسابه على منصة إكس للتواصل الاجتماعي.

تصريحات ميدو عبر حسابه

عبر ميدو عن انتمائه للنادي الزمالك، حيث قال: “أنا ابن الزمالك وأكبر فخر ليا في حياتي إني ابن المدرج ابن الثالثه يمين بلعب في الزمالك من وأنا عندي 9 سنين وأنا عيل صغير كنت بروح بـ فانلة الزمالك في المواصلات علشان الناس كلها تعرف إني ناشئ في الزمالك.. بطاقتي وأنا عيل صغير هي كارنيه اتحاد الكورة اللي مكتوب عليه اسم الزمالك.. تتلمذت على ايد مدربين عظماء علموني إني أنتمي لفريقي بس وما أشجعش أي نادي ثاني في مصر بالذات إلا نادي الزمالك أي كان بيلاعب مين.. ولكن في نفس الوقت اتربيت اني احترم كل المنافسين وأهنيهم لو كسبوا وأباركلهم وأقولهم هارد لك لو خسروا”.

وأضاف: “هو ده معنى الروح الرياضية بالنسبة لي لما اتسألت في الاستديو هتشجع الأهلي في كاس العالم للأندية رديت بطبيعتي دون أي نفاق أو كذب لان بكل بساطه مفيش حاجه في الدنيا تستاهل إنك تكون كذاب ومنافق، اتفق معاكم إن التوقيت ما كانش مناسب وبعتذر لأي حد زعل إني قلت الكلام ده في حدث مهم يخص النادي الأهلي وأنا شايف الناس اللي زعلت بخصوص إن الوقت مش مناسب عندهم كل الحق.. أما لو اتسألت مليون مرة هتشجع أي نادي تاني في مصر غير الزمالك إجابتي هتكون هي هي عمرها ما هتتغير لغاية لما اموت”.

تصريحات ميدو على جماهير الأهلي

من جانبه أضاف ميدو: “أما بخصوص الهجوم اللي بتعرضله فأنا عاذر الناس لانهم ممكن يكونوا اتعودوا على إجابات مختلفه في السنوات الأخيرة من ناس تصدروا المشهد في الإعلام وهما اكتر ناس بيأذوا المنافس في الخفاء واكتر ناس بتتمنى من قلبها خسارة المنافس من جواهم.. مش هرد على أي حد هاجمني لان بكل بساطه أنا في مرحلة في حياتي شايف إن مفيش حاجه في الكورة تستاهل الخصومة والخناق بالعكس الكورة اتعملت علشان نتسلى بيها ونستمتع بيها ونناكف بعض شوية بس بالنسبه لي ماتتعداش اكتر من كده”.

واعتذر ميدو قائلًا: “مرة ثانيه بعتذر اني كنت سبب في جدال قائم الأيام اللي فاتت للاسف مش ذنبي ولكن بسبب مدمنين الترند والدخلاء على كرة القدم اللي لا يمكن يفهموا أبدا عقلية مشجع الكورة”.